Fotefar mot nord almmuha dál ođđa prošeavtta Midt i historien (Guovdu historjjá), gos mánát ja nuorat leat guovddážis. Prošeavttas bovdehallet skuvlaoahppit guorahallat, dulkot ja gaskkustit kulturárbbi mii lea čadnon sin iežaset suohkana Fotefarii – iežaset sániiguin ja perspektiivvaiguin.
Govva: Aina Alice Ronte Santamaki.
Ovttasbarggus Kultuvrralaš skuvlaseahkain besset oahppit čállit iežaset historjjáid main báikkálaš Fotefarat leat vuolggasadjin. Dát muitalusat galget maŋŋel báddejuvvot ja šaddat oassin audiovisuála čájáhusas mii ovttastahttá jienaid, govaid ja báikki historjjá.
Prošeakta lea dál álggahuvvon pilohtaprošeavttain ovttas Várdobáikkiin, mas lea Fotefara Gállogieddi guovddážis – márkosámi dállu Evenášši suohkanis. Sámegieloahppit guovllus leat čállán gelddolaš ja hutkás muitalusaid ulddaid birra mat orrot báikkis, ja maid eará muitalusaid mas eallin, luondu ja árbevierut Gállogiettis leat inspirašuvdnan.
Midt i historien addá mánáide ja nuoraide vejolašvuođa leat aktiivvalaš kulturgaskkusteaddjit, ja lea maid seammás veahkkin čalmmustahttime jienaid, gielaid ja muitalusaid girjáivuođa oassin Fotefar mot nordas.